E-pad ar film...

Pep hini en e blas, er gaoz evel er c'han...

Dec'h e oa ar vreudeur Morvan ganeomp evit diskouez ar film "e skeud kanañ"  (Jérémy Véron, France 3) hag evit kontañ kaoz gant hor skolajidi 4re ha 3de klas. Tremenet eo eus ar c'hentañ. Un darempred eeun, gwirion gant an dud, jentil ha prest da reiñ kement ha da resev !

Goude ar fim ez eus bet kaoz diwar ar c'han, an dañs goude koan gwechall, ar festoù-noz o tont da vev... Tomm, a galon, eo bet an darempred etre ar skolajidi hag an daou vreur. Eeun ha frank eo bet ar goulennoù hag ar respontoù. Trugarekaet hardizh eo bet ar ganerien evit bezañ deuet betek ennomp hag evit holl ar pezh o deus roet deomp eus an hengoun bev e Breizh. An traoù-se a zo bet roet dezho ha kontant int d'o reiñ d'an holl d'o zro... Pe e Skolaj Diwan Jakez Riou pe dirak miliadoù a dud gant Taboulinoù ar Bronx en Erer Kozh... An holl o devo soñj ez int labourerien-douar a vicher ha n'eo ket kanerien a vicher hag ivez n'o deus morse lavaret nann pa vezent pedet da ganañ en tu pe du gant ma c'hellent ha gant ma oa e Breizh. D'ar Frañsizien o deus c'hoant da welout anezho dont da Vreizh ! Fromus ha kendrec'hus ivez o "n'eus ket a Vreizh hep brezhoneg" ha "dalc'hit mat gant hon yezh !" "Pep korn-bro en deus e stumm brezhoneg !" Dec'h, avat, eo bet komprenet aes ha mat an daou vreur gant hor skolajidi ha selaouet ha komprenet mat int bet ivez d'o zro.

Kozh ha yaouank unanet gant ar c'han...

Krog ganti...

Goude ar goulennoù un ton plin gant Marine, Sterenn ha Loeiza. Deuet brav, trugarez dezho. Tro ar vreudeur war-lerc'h gant Joli coucou. Poent diac'hubiñ ar sal, frankiz dezhi da zañsal plin, pachpi...Ur gwir blijadur !

Dao de'i !

Da echuiñ abadenn sinañ follennoù koulz evit ar skolajidi hag an dud gour.

Trugarez da Herri, da Yvon, da Agnès a oa ganto ha da Elen eus Daoulagad Breizh bet prientet mat-tre an traoù ganti. Ha ken ur wech all bennak !

E skeud ar gwenn-ha-du hag an ikurriña

Setu degouezhet kannaded an nevezhañv. Gant Pepe ha Joserra da ambrougerien 23 skolajiad deuet d'ober anaoudegezh gant o c'henskriverien ha gant hor bro.

Digwener vintin, lein goude un nozvezh karr-boutin, degemer ha digoroù.

Pourmenadenn betek kreiz-kêr dre Menez Fruji da gaout ur sell a zoare war hor c'hember, Oded ha Stêr-Deir...

War Menez Fruji

Enor, enor d'ar sonerien, Yann ha Thibault

Goude-se abadenn a zegemer mat gant Loïc Philippon, kuzulier e karg eus ar brezhoneg, ha gant Jannick Yvon, kuzulierez-kêr. Prezegennoù pederyezhek, euskareg, brezhoneg, galleg ha kastilhaneg. Lakaet e oamp bet souezhet war vat gant Pepe deuet brav gantañ e ginnigadur digeriñ er skolaj e brezhoneg. Komprenet eo bet

gant an holl ! Evel m'eo bet lavaret en ti-kêr n'eus ster ebet d'ar stourm evit hor yezhoù nemet ma reer ganto ! Un tamm brud a zo bet d'hon eskemm er media gant an Télégramme, Ouest-France, Penhars Info ha Radio Kerne.

Deuet brav e oa an dañs a enor, an aurresku !

Aurresku !

Ar prezeger er gador...

Goude merenn e oa bet aozet ur pennad video berr diwar-benn istor karter Kervoazan e Penharz hag ur valeadeg heñchet gant André Calvez, kelaouenner Penhars Info. Meur a garter a zo e-barzh ar c'harter, e gwirionez...ha spi a zo e vo bet gwelet un tamm ar strivoù da wellaat al lojañ hag ar bevañ mat asambles !

O vont da dreuziñ ar pont...

Un heñcher a oar diouzh e garter ha bezañ kannad anezhañ...

Evit echuiñ gant an devezh, c'hoarioù pobl, stal aozañ krampouezh gant Mathieu, dañsoù ar vro gant Fañch ha treserezh eskemm gant Ronan. Tremenet eo diouzh ar c'hentañ an traoù war don ar blijadur hag ar geneiliezh. Peadra da reiñ c'hoant, evel-just, da skolajidi ar c'hlasoù all.

Sachañ ar fun...

A-unan !

En dalc'h emañ an dañser(ez) !

Fañch o kas an dañs-tro, hardizh !

Div identelezh dirak ha dirak, mennozh mat, Ronan !

Ma oa un disterañ glizh oc'h ober digwener eo aet an amzer war gaeraat abaoe, un eskemm dindan an hinon eta !

Trugarez d'an holl o deus roet dorn evit an degemer brav-se !

Joserra ha Pepe e-tal kichen hon ti-annez kozh. E-pelec'h ?

D'ar 14 a viz C'hwevrer o deus an holl 3deidi kaset an devezh a-bezh e Karaez, ha leun-chouk roll-amzer an devezh.

Diouzh ar mintin o deus gellet dizoloiñ lise Diwan Karaez, al lise hollvrezhonek nemetañ a zo e Breizh. Degemeret hag ambrouget int bet gant liseidi bet en hor skolaj.

Salud stal ar skiantoù

Kemeret o deus perzh en ur gentel skiantoù kaset gant Lomig Bosser, dizoloet o deus ar c'houskva asambles gant Markus Peres, ar penngasour, hag an henchañ el lise  a zo bet displeget dezho gant Paol Mingant. Goude pred kreisteiz o deus bet ur pennadig amzer vak m'o deus gellet kaozeal gant al liseidi.

Ouzh taol e Kerampuilh ! Mat eo ar geusteurenn ?

 Etre 1e30 ha 3e30 o deus gellet kejañ ouzh meur a zen gour a ginnige e vicher da-geñver 6vet Kroashent Diwan ar micherioù e leurenn Glenmor.

Aozer meur an devezh a chom uvel. Salud, Erwan !

Morwenna, plijet-bras !

Dizagn, micherioù tost d'an natur, mezegiezh, micherioù ar c'hleweled ha micher

ioù ma reer gant ar brezhoneg a oa e-touez ar re  a zo bet kinniget... Ha pep tra e brezhoneg!  E-touez an dud er sal e oa Lea Toulgoat, pomperez, bet en hor skolaj, hag Owen Poho, dizagnour/grafour, bet kelenner en hor skolaj ivez.

Ur bomperez entanet gant he micher !

Ur vaouez eus Kreizenn Ditouriñ ha Heñchañ Karaez a oa war al lec'h ivez, da zisplegañ dezho war be dachenn mont, pe  e vefe goude an 3de klas, pe goude ar vachelouriezh zoken.

Ezhomm a vo a gelennerezed en hor skolioù...

Owen, helavar gant e zispleg

Preder hag adpreder !