Al lochoù

Aketus outi...

 E tekno hon eus graet lochoù evit ar c'haouenned bihan. E Kerne-Izel ne vez kavet ar c'haouenned-se nemet e bro Borzhe.  E pad ar vakansoù goañv omp bet en un ti-feurm e Kast, o staliañ div loch.  Staliet in bet en ul lec'h ma n'eus ket re a drouz, neuze ne vo ket direnket ar c'haouenned.  

Abel, uhel bintet...

Abel ha Dorian, staliet ganto al logell...

Marteze ne vo ket kaouenn ebet el lochou ar bloaz-mañ, ret e vo gortoz un nebeud bloavezhioù.  Bep bloaz e vo ret mont da sellet hag-eñ zo kaouenned enno.  

Abel ha Dorian

Evit an eil gwech o deus savet re 5vet ar Skolaj lochoù neizhiañ kaouenned bihan Athene noctua. E-pad kentelioù tekno Mathieu int bet savet gant boestoù gwin koad.

Gourc'hemennoù d'ar c'hlasad ha d'o c'helenner, Mathieu, hep disoñjal Klaod ha Ronan !

Sikouret en doa Klaod o raktroc'hañ tammoù koad ha korzennoù pvc a oa da vezañ staget. Labour ar re 5vet zo ul lodenn eus ul labour enklask ha gwareziñ al labousedigoù preizh noz-se kaset da-benn gant strollad Kerne-Izel ar Groupe Ornithologique Breton.

Ronan Debel

Setu degouezhet fin bloavezh « Collège au cinéma » evit ar re 4re. Gwelet hon eus tri film, unan dre drimiziad. An hini kentañ a oa ur gomedienn sokial « Les Apprentis », istor daou zen yaouank kollet un tamm hag o klask ur ster evit o buhez. Unan eus rolloù gwellañ Guillaume Depardieu aet d'an anaon kalz re abred.

En eil trimiziad hon eus tañvaet bed Alfred Hitchcock gant « Rear Window », un istor polis ispisial. Tro hon eus bet da brederiañ war dem ar sellerezh. Betek pelec'h mont gant furchadegoù e buhez an dud hep mont re bell, a-enep al lezenn ? Sapre Hitch a c'hoari gant e bublik en ur vountañ anezhañ da vezañ dipitet ma ne c'hoarvezfe ket un torfed !

 Rear window

Hag evit echuiñ, « El Bola », kentañ film hir Achero Mañas (foto) eus Bro-Spagn a gont istor ur paotr 12 vloaz, Pablo, ur sekred pounner gantañ, hag a zeuio a-benn, a drugarez d'e vignon Alfredo, da zispakañ e gudennoù. Ur film efedus o komz eus ar feulster hep e ziskouez; un istor kreñv ha fromus hep ma vefe ur fromc'hoariva.

Achero Mañas

E-pad ar film...

Pep hini en e blas, er gaoz evel er c'han...

Dec'h e oa ar vreudeur Morvan ganeomp evit diskouez ar film "e skeud kanañ"  (Jérémy Véron, France 3) hag evit kontañ kaoz gant hor skolajidi 4re ha 3de klas. Tremenet eo eus ar c'hentañ. Un darempred eeun, gwirion gant an dud, jentil ha prest da reiñ kement ha da resev !

Goude ar fim ez eus bet kaoz diwar ar c'han, an dañs goude koan gwechall, ar festoù-noz o tont da vev... Tomm, a galon, eo bet an darempred etre ar skolajidi hag an daou vreur. Eeun ha frank eo bet ar goulennoù hag ar respontoù. Trugarekaet hardizh eo bet ar ganerien evit bezañ deuet betek ennomp hag evit holl ar pezh o deus roet deomp eus an hengoun bev e Breizh. An traoù-se a zo bet roet dezho ha kontant int d'o reiñ d'an holl d'o zro... Pe e Skolaj Diwan Jakez Riou pe dirak miliadoù a dud gant Taboulinoù ar Bronx en Erer Kozh... An holl o devo soñj ez int labourerien-douar a vicher ha n'eo ket kanerien a vicher hag ivez n'o deus morse lavaret nann pa vezent pedet da ganañ en tu pe du gant ma c'hellent ha gant ma oa e Breizh. D'ar Frañsizien o deus c'hoant da welout anezho dont da Vreizh ! Fromus ha kendrec'hus ivez o "n'eus ket a Vreizh hep brezhoneg" ha "dalc'hit mat gant hon yezh !" "Pep korn-bro en deus e stumm brezhoneg !" Dec'h, avat, eo bet komprenet aes ha mat an daou vreur gant hor skolajidi ha selaouet ha komprenet mat int bet ivez d'o zro.

Kozh ha yaouank unanet gant ar c'han...

Krog ganti...

Goude ar goulennoù un ton plin gant Marine, Sterenn ha Loeiza. Deuet brav, trugarez dezho. Tro ar vreudeur war-lerc'h gant Joli coucou. Poent diac'hubiñ ar sal, frankiz dezhi da zañsal plin, pachpi...Ur gwir blijadur !

Dao de'i !

Da echuiñ abadenn sinañ follennoù koulz evit ar skolajidi hag an dud gour.

Trugarez da Herri, da Yvon, da Agnès a oa ganto ha da Elen eus Daoulagad Breizh bet prientet mat-tre an traoù ganti. Ha ken ur wech all bennak !