Ur gonterez a zoare, plijet o taremprediñ ar re yaouank, eo ivez Soazig Daniellou

Digwener e oa bet Soazig Daniellou er skolaj o tiskouez d'hor pempvedidi Erwan, un teulfilm graet ganti evit Frañs 3 diwar-benn Erwan Konk bet skolajiad er Releg ha lisead e lise Diwan Karaez un nebeudig bloavezhioù 'zo. Kement-mañ a oa an hini gentañ evit hor skolajidi 5ved eus an teir abadenn sinema dre live klas a vo dalc'het er skolaj er bloaz-mañ  dre berzh ar gevellañ sinet etre Daoulagad Breizh, ar C'huzul-meur hag ar skolaj. Evel bewech e oa deuet Elen Rubin en anv Daoulagad Breizh d'ober un darempred plijus etre den ar film hag ar skolaj. Plijet eo bet ar skolajidi gant ar film, fromet hag esmaeet ivez. Ur gentel a youl vevañ hag a blijadur da vont war-raok daoust d'ar c'hleñved, miopatiezh, daoust da bep skoilh, eo bet evito. Goulennoù a zo bet diwar-benn ar sport evit tud nammet, ar c'hampionadoù mell-droad war gadorioù-ruilh. N'en doa ket gellet Erwan bezañ ganeomp, siwazh, nemet spi bras hon eus e c'hello dont ur wech all, laouen e vimp ouzh e zegemer !

Tro o deus bet ivez skolidi gozh skol Tregon oc'h adkavout ar sevenourez  he doa savet ur film ganto, Prad don e anv, diwar o fenn gant Anicet Furic en e atant... Eñvorioù bourrus-kenañ hag ar c'hoant da gemer perzh e filmoù all...

Plijet an dud...

Na kuñv o feur !

"Touch, gwelet, selaou, c'hwesha"...Dec'h e oa bet diskouezet dre hanterouriezh Daoulagad Breizh ar film-se d'hor skolajidi 6ved ha deuet e oa Guy Joncour da gontañ kaoz ganto. Deuet e oa krec'hin chas-dour gantañ. Blev kalet ha flour, lec'h d'an aer da dremen etrezo. Soñjit 'ta e talveze pep kroc'hen kement hag ur mizvezh labour devezhour gwechall pe c'hoazh priz ur marc'h-houarn ! Bremañ e talv kement hag ur mell tell-gastiz hag ur pennad amzer toull-bac'h da neb a vez tapet o vigriañ !

Start buhez ar vezeien-loened war ar maez. Sikour ar saout diaes dezho halañ, operiñ anezho, adlakaat stomog ur vuoc'h en e blas, tennañ un dorosenn-gig grignbevek diwar bav ur c'hi hag all, hag all... Un tammig diaes ha doñjerus a-wechoù da zaoulagad kizidik hor skolajidi yaouank. Evel ma oa da zaoulagad ar paotrig eizh vloaz a hunvree dont da vezañ mezeg-loened ! Displegadennoù an den a vicher a ra o zreuz avat, gwad ya, met saveteiñ al loened an hini eo a gont ! Labourat evit ar vuhez ha stourm ouzh ar boan !

Un hir a hent eo bet hini mezeg-loened Kallag, tremenet a zineizher da warezer natur... Mab-bihan boureller Plourac'h o wriat d'e dro war gig bev al loened an dro-mañ.Klask kompren ar bed ha talvoudegezh ar plant a reer loustonioù anezho, koulz hag al loened gouez a zo war an douar evit seveniñ pep a gefridi. Difenn kefeleged al lannoù, ar chas-dour, ur sevenadur, un doare bevañ, kreiz-Breizh hag ar vreudeur Morvan, kement-se holl eo kemennadenn ar medisin.

Hag ouzhpenn a zo ! N'eo ket aes dont da vezeg-loened, studioù start a zo. Koulskoude, mar fell deoc'h mont war ar vicher-se dre ma karit al loened, arabat digolonekaat morse. an huñvre hag ar strivoù d'en diraez an hini a gont. Arabat diskregiñ, strivit, barregezh a zo ennoc'h. Kaerañ kemennadenn evit hor skolajidi !

Trugarez da Guy Joncour, da Elen Rubin a Zaoulagad Breizh, buhezek eo bet ar gaoz ha piv oar, marteze ez eus meur a hunvre e go ?