BUENOS AIRES

Erruet on e Buenos Aires d'an 21 a viz Gwengolo, ha ne oa ket brav an amzer ! « Hace frio ! » a vefe tu lavarout e spagnoleg.

Kêr-benn Bro-Arc'hantina eo Buenos Aires, bras-tre eo gant meur a garter. Amañ ne vez ket komzet eus straedoù pe eus balioù, met eus « cuadra ». Tout ar c'huadraioù a zo a-skouer gant ar re all. Un tammig evel e Brest, m'ho peus c'hoant. Souezhet on bet e Buenos Aires gant plasenn Miz Mae (Plaza Mayo). En em vodañ a ra eno, atav, mammoù-kozh ar re a zo bet lazhet e-pad ar « guerra sucia », ar brezel lous. Etre 1976 ha 1983, ez eus bet skrapet, jahinet ha lazhet 30 000 a dud a oa a-enep ar re e penn ar vro. Anvet int « los desaparecidos » peogwir ne ouezomp ket pelec'h int bet douaret. War ar blasenn-se e vez manifestet ivez alies evit traoù all, evel pa vez gounezet ur match mell-droad gant skipailh Arc'hantina !

Ur porzh eo Buenos Aires (evel ma welit war ar foto 1), met n'eo ket ar mor a erru e Buenos Aires, kentoc'h ur stêr vras. Ha gwelet e vez ur bern bigi war ar stêr-se.

Pa 'z on erruet en Arc'hantina ne oa ket bet dilennet en-dro c'hoazh Cristina Kirchner da brezidantez ar vro. Ur bern skritelloù eus an holl dud war ar renk oa neuze evit an dilennadegoù.

E Buenos Aires, em eus gwelet ur bern bugale er-maez eus ar skol e-pad an devezh. Perak 'ta ne oant ket er skol ? Peogwir amañ en Arc'hantina, ne vez skol nemet diouzh ar mintin pe nemet goude lein, depand a ra eus ar c'hlas m'emaout. Chañs o deus, keta ? Pep skoliad ivez en devez ur gwiskamant. Ar gwiskamant-se a zo disheñvel e pep skol.

Plijout a ra kalz d'an dud en Arc'hantina mont e-barzh ar parkoù d'ar sul. Dont a reont da evañ Mate (un te kreñv), da c'hoari mell-droad pe da ruzañ un tamm.

Plijout a ra ivez d'an dud debriñ ! War ar foto-se eo ur « plato combinado », ur mesk eus fourmaj, kig ha legumaj.

Ur c'harter en deus plijet din e Buenos Aires, hini « La Boca ».

Amañ ez eus ur stad, lec'h ma c'hoarie Maradonna. Mod-all ez eus ivez ostalerioù, abadennoù tango ha livet eo an tiez gant kalz a livioù disheñvel. Brav tre !

PUERTO MADRYN

Goude bezañ bet tremenet ur sizhun e Buenos Aires em eus kemeret ar bus evit mont suoc'h, da b-Puerto Madryn. Ret eo lavarout ar wirionez, ur gêr gouronkañ eo ha n'eo ket brav tamm ebet Puerto Madryn. Met e-kichen Ledenez Valdes emañ, hag el ledenez-se e c'heller gwelet balumed.

Un tammig suoc'h c'hoazh, e PUNTA

TUMBO, em eus bet tro da welet manked,

loened farsus-kenañ !

Ha klasket em eus bale evelto !

Mod-all em eus bet tu e Puerto Madryn da zebriñ un Asado, ur « barbecue » ma fell deoc'h. Lakaet e vez ur bern kig da boazhañ ha mat-kenañ eo.

EL CALAFATE

E-kichen El Calafate emañ skorneg Perito Moreno, unan eus ar re vrasañ e Suamerika (war an douar ha ket er mor). Souezhus-kenañ eo gwelet tammoù skorn a gouezh e-barzh al lenn. Ober a reont un trouz spontus !

EL CHALTEN

Evit echuiñ va beaj e Bro-Arc'hantina em eus dibabet bale un tamm e park broadel ar Skornegi.

Ha goude c'hwec'h eurvezh bale, setu ar pezh em eus gwelet. Brav eo, 'keta ?

Ken ar c'hentañ e Bro-CHILE !

E 5vet klas e labourer war dodenn ar faltazi. Goude kinnig Ganedigezh Gwener gant Botticelli (livet e 1485) e oa dav d'ar skolajidi kinnig o doare da welout ganedigezh an doueez. Unan eus livadurioù bravañ ar bed eo. Degaset ez eus bet kemmoù ha deuet eo brav gant Olwen!

--

D'ar Gwener 11 a viz Meurzh 2011 ez eus bet ur c'hren-douar divent e biz Bro-Japan, ment 8,9 war skeul Richter. Ar pempvet kren-douar brasañ a zo c'hoarvezet er bed abaoe 1950 an hini eo. Kalon ar c'hren-douar a oa 24,4 km dindan ar mor, war-hed 380 km eus Tokyo. Eno e fiñve c'hoazh an tourioù un nebeud munutennoù goude ar c'hren-douar. C'hoarvezet eo abalamour da riskladenn ar plakennoù tektonek : hini Eurazia he deus risklet ouzh hini ar Meurvor Habask, hag ar c'hontrol.

Diouzh ar fiñvadenn-mañ ez eus savet un tsunami a rae war-dro 10 m uhelder pa strakas ouzh aodoù Bro-Japan.

Goude ar gwalloù-se e paouezas 11 kreizenn nukleel diwar ar 17 a zo er vro, teir deus outo a zo gant diaesterioù bras : hini Oganawa, hini Fukushima hag hini Tokaï. Tarzhet ez eus kefluskerioù e Fukushima. War a seblant e vo gwashoc'h ar gwagennoù nukleel eget ar gwagennoù sismek. Ar gwagennoù sismek hag o deus lazhet muioc'h eget 10 000 a dud. Ur gwall spontus a vo neuze !

Marine, 4re Glas